Kepaya kwa yulululwa

Omunandjungu woinima ya pamba onghalafano Michael Amushelelo nomufeekelwa pamwe naye moshipofa shekengelelo leemiyona onduba osho sha kala shi li momhangu yopombada yaVenduka oule weedula nhee otava ka pitikwa va ninge omaindilo eepassporta dipe paife, nokuya koSouth Africa va ka konge oohahende. Oshinima esho she ya konima omilandu dobooloha yaAmusheleo (34) nomufeekelwa pamwe naye Gregory Cloete (37), kwa li nda lundululwa komupanguli ta vatele Marilize du Plessis pefimbo kwa li ovalumenhu ava vavali va holoka momhangu Omaandaxa. Omilandu dobooloha okwa li da lundululwa medina leudafano pokati komupopiliko wepangelo Constance Moyo nahahende Ndahambelela Hifene. Amushelelo, Cloete nomahangano a yooloka a kalelwa po kuAmushelelo momangela yokukengelela oshimaliwa oyo kwa li tava ningi koshi yo “Project One Million” momudo 2018 no2019 otava tamanekelwa oshipofa shomangele yokukengelela oimaliwa. Amushelelo naCloete aveshe otava tamanekelwa oipofa i li 360, mwa kwatelwa oipofa i li 348 yekengelelo, oumbudi wokuheka, oipofa ivali yoimaliwa ihe na eedjo da yukilila naikwao ihapu. Amueshelelo natango ota tamanekelwa vali oipofa imwe mwa kwatelwa okuhenuka okufuta otekisa. Epangelo ola ti kutya Amushelelo naCloete nomahangano a kalelwa po kuAmushelelo okwa li taa kufa oimaliwa kovanhu ovo kwa li va hekwa kutya otava ka mona mo oiyemo i li pombada moimaliwa yavo oyo tava yandje. Amushelelo naCloete vati ova mona oshimaliwa shi fike peemiliyona N$14.7 okudja kovanhu va tumbulwa moipofa yavo oyo va taalela. Otava tamanekelwa yoo vali kutya ova longifa oimaliwa yovanhu, va lande omatuwa a yooloka ondilo. Ovalumenhu ava vavali ove li kondje kobooloha yoshimaliwa shi fike poN$35 000 keshe umwe, oyo kwa li ya yandjwa kuvo konima kwa li va mangwa po muOktoba 2019. Omalunduluko oo a ningwa po kombinga yomilandu dobooloha, Amushelelo naCloet paife otava dulu okuninga omaindilo eepassporta dipe ngee omikanda davo dokuya momalweedo odo ve na paife da kwishi, ashike ove na okuyandja keshe opassporta ipe komupolifi oo e na oshinakuwanifa shokuninga omakonakono oshipofa shavo. Otava ka pitikwa va longife eepassporta dipe va ye koSouth Africa va ka popye noohahende, ndee tave di shunifa komupolifi ngee va alukile moNamibia. Amushelelo naCloete itava ka kala vali tave lilopota kopolifi oikando itatu moshivike. Du Plessis okwa pula opo va kale ashike tava lopota kopolifi lumwe moshivike, keshe Omaandaxa ile Etitano. Natango inava pitikwa okudja mo mOvenduka inava pewa ediminino komunambelewa ou ta konakona oshipofa shavo. Oshipofa eshi ovalumenhu ava tava tamanekelwa osha kala momhangu yopombada yaVenduka okudja muSeptemba 2021. Oihokolola yavo tai shikula ko otai ka kala momhangu yopombada momafiku 19 Novemba.