የኢትዮጵያ ሕዝብ ታላቅና አኩሪ መስዋዕትነት ከፍሎ ያቆያት ሀገሩን ዛሬም ከጥፋት ይታደጋት!! ከተባበረ ይችላልም!!!

ይህ የኢሕአፓ የወቅቱ የትግል ጥሪ ነው! ሀገር የዜጎቿ እጅ ስራ ናት። የሀገር ህይወቷም፣ ልማቷም፣ ዕድገቷም፣ ሠላሟም፣ውበቷም የሚገኘው ከሕዝቧና በሕዝቧ ጥረት ነው። ያለሕዝቧ ሁለንተናዊ በይነግብር ሀገር ምደረበዳ ነች። ኢትዮጵያን እልፍ አዕላፍ ዜጎቿ  ደማቸውን አጉርፈው ውቅያኖስን አቅልመው፣ አጥንታቸውን መርከብ አድርገው፣ ገጣጥመው፣ አያሌ ማዕበሎችንም ተቋቁመው፣ ቀዝፈው፣ ተሻግረው፣ ከትውልድ ወደ ትውልድ አስተላልፈዋታል። በቀደሙት ልጆችዋ አርቆ አሳቢነት፣ ቁርጠኝነት፣  ሁኔታዎች ግድ ሲሉም ተገቢውን ሁሉ መስዋዕትነት በመክፈል የተመሰረተችው ኢትዮጵያ ዘንድሮ ከአብራኳ የወጡ በማይመስሉ አምባገነኖች ክፉኛ እየደማች እና እየወደመች ነው፡፡ ዜጎች በጅምላ ተጨፍጭፈዋል፡፡ ህጻናት እና እናቶች ተደፍረዋል፡፡ ሰዎች በህይወት እያሉ ተቃጥለዋል፤ በእምነት እና አመለካከታቸው ተገድለዋል፡፡ በርካቶች ታግተው የገቡበት አልታወቀም፡፡ ሕዝብ በጠላትነት እየተፈረጀ በየተራ እልቂት ታውጆበታል፡፡ “ዘመድ የሞተ ዕለት በአገር  ይለቀሳል፣ ሀገር የሞት ዕለት  ወዴት ይደረሳል?”  የሚለው ትውልድ ተሻጋሪ ምሳሌ፣ ከዛሬው ትውልድ ዘመኑን የዋጀ ምላሽ ይጠይቃል። ኢትዮጵያዊያን ሀገራቸውን ከባዕዳን ወራሪዎችና ጣልገቦች ብቻም ሳይሆን ከሀገር-በቀል አጥፊዎችም ተከላክሎና ጠብቆ ለማዳን ሁሉም የወቅቱን ሁኔታዎች አስከፊነት የተገነዘቡ ልጆቿ በቋንቋ፣ በኃይማኖት፣ በአመለካከት ልዩነቶች ሳይከፋፈሉ፣ ለገዥዎች የመከፋፈልና ነጣጥሎም የማጥቃት ስልት ሳይበገሩ፣ ዛሬ ሀገር የምትገኝበት አዘቅት የጠላትን የነገድ ልዩነት አጥር ሰባብረው፣ ዘላቂ ሠላምን፣ የሁሉም ዜጎችን ነፃነትና መብቶችን፣ እንዲሁም የተነፈጓቸውን ጥቅሞቻቸውን በተጠናከረ ሠላማዊ ትግል ለማግኘት፣ በአንድነት የሚንቀሳቀሱበት ወቅት ነው። በሕጋዊና ሠላማዊ የተደራጀ ትግል ኢትዮጵያን ለሁሉም ዜጎቿ የተሻለች ሀገር ማድረግ ይቻላል። ኢሕአፓም ዜጎቿን ዛሬ ከሚገኙበት አስከፊ ሁኔታ ለማውጣትና ኢትዮጵያን ከተደቀነባት አደጋ ለማትረፍ፣ ባለቤት ከሆነው የኢትዮጵያ ህዝብ ጋር በምቹ መድረኮች በመምከር የሰላማዊና ሕጋዊ ትግል  አማራጮችን ሁሉ ለመጠቀም በትውልድ ፊት ቃል ገብቶ ከሕዝብ ጋር አብሮ ይሠለፋል። በዚህ ታላቅ ሕዝባዊ ስብሰባ ላይ የንጹሃን እልቂት፣ የግፍ እስር፣ ጦርነት፣ ድህነት፣ ረሃብ፣ የሰላም እጦት፣ ስደት፣ መፈናቀል እና ሕዝባችንን ያጎሳቆሉት መከራዎችን ማብቂያ እንመክራለን፡፡ የኢትዮጵያን የመከራ ቀንበር በሕዝብ ሀይል፣ ጥበብ እና መተባበር በአጭር ጊዜ እንሰብረዋለን! ስለሆነም በሕዳር 27 ቀን 2018 ዓ.ም በኢሕአፓ አዘጋጅነት በአዲስ አበባ በሚካሄደው ታላቅ ሕዝባዊ ስብሰባ እንዲገኙና ወገናችንን ከእልቂት ሀገራችንንም ከጥፋት ለመታደግ በጋራ እንድንመክር በአክብሮት ተጠርተዋል ። ጽናት እስከ ድል!! የኢትዮጵያ ሕዝብ አብዮታዊ ፓርቲ (ኢሕአፓ) ሕዳር 15 ቀን 2018 ዓ.ም አዲስ አበባ፤ ኢትዮጵያ